英國床褥點揀？呢個牌子最快到貨 仲有慳錢貼士！

香港人到埗第一件事，梗係要安排好住宿起居，有個安樂嘅落腳點先可以慢慢settle down㗎嘛。而無論你係租屋定買屋，最先要做打算嘅家具一定係床褥，確保新居入伙時唔使訓地下，有覺好訓！英國床褥購入嘅途徑主要有兩種，一係喺連鎖床具用品專門店買，另外亦都有專營網店嘅品牌。小編就根據以往租、買屋嘅經驗，喺下面同大家比較以下各個牌子嘅優劣，希望幫到各位置辦新屋家具用品。

英國床褥連鎖門店

首先要介紹嘅係各間英國床具用品專門店，呢啲牌子一般都有實體門市，方便客人到現場親身體驗過張床褥先畀錢購買。呢啲大品牌除咗會有自己推出產品外，亦會有代理其他主要床褥牌子，但同時因為規模較大、服務多，一般價錢都會稍貴，適合對床褥質素有講究，捨得投資更多嘅客人。

Dreams

講到買床褥，不得不提嘅就係Dreams。Dreams可以話係英國最大嘅床褥舖頭，喺各區嘅Highstreet同埋Retail Park都會見到佢地門市嘅身影。所以，Dreams最大嘅優點就係方便，當你想物色新床褥嘅時候，搵下屋企附近邊度有，入到舖頭再同Sales講你偏好點樣嘅床褥，專業嘅服務人員就自然會帶大家去到適合你嘅款式度試訓。Dreams床褥嘅款式都幾齊全，無論係軟硬，定各種創新材質（例如竹、涼感物料）等都有，對床褥有要求嘅你應該都揀得落手。如果試得啱，仲可以即場畀錢落order，一次過搞掂曬，唔使自己慢慢入資料咁麻煩。

要留意嘅係，同買其他家俬一樣，喺實體店買床褥都比較容易遇到缺貨問題。好多時揀咗心水款式，落單後都要等成幾個月先至有貨送到。所以如果各位係啱啱收樓，趕住要有張床褥訓覺嘅話，咁呢個途徑就未必適合你啦！

Bensons For Beds

至於Bensons For Beds，其實都係主流嘅床褥專門店，不過門市數量就冇Dreams咁多咁廣，可能會冇咁方便。雖然係咁，大部分Bensons For Beds嘅門市都會係Dreams附近，想多個比較嘅朋友不妨搵個有齊兩個牌子嘅Retail Park，一次過試曬佢。

同Dreams一樣，喺Benson For Beds買床褥嘅好處就係有得試訓，同埋款式較多，亦都有服務人員從旁指導你點揀。但缺點亦都一樣，就係缺貨問題嚴重！小編朋友就試過喺Benson For Beds買床褥，預計送貨日期一改再改，認真搞到「冇覺好訓」。情況比Dreams更嚴重，想買嘅朋友要預好時間！

英國床褥網購

講咗咁耐，可能大家都好奇，如果床褥缺貨問題咁嚴重，而你又要儘快攞到貨，咁究竟有咩辦法呢？答案就係幫襯一啲mattress-in-a-box嘅網上品牌。呢啲網上牌子嘅床褥全部都係自家品牌，加上款式比較少，所以貨量比較充足，一般一落單就可以寄出，啱曬趕住用嘅人。

Nectar

Nectar主要有兩大款床褥，分別係普通嘅記憶棉Memory Foam，同埋混合Hybrid系列。每個材料都有幾隻Level揀，可以按照需求同埋預算揀。小編屋企客房就係用最普通嘅記憶棉床褥，厚度都足夠而且唔會太軟熟，啱曬鍾意有返啲Support嘅港人。小編買嘅時候Nectar仲送咗兩個枕頭，拆開即刻有得用，咁就唔使另外煩買枕頭嘅事。

大家可能好擔心，呢啲mattress-in-a-box冇得試訓，會唔會好容易中伏？有見及此，品牌都有個365日免費退換政策，購買床褥後365日內都可以無條件退貨。所以大家買嚟應急用住先，試清楚之後再決定要唔要，或者畀啲時間自己慢慢揀心水款都認真唔錯。最正嘅係，Nectar唔使加錢就可以指定送貨日期，非常適合收樓/入伙時間選擇較為有限嘅人，唔使預留太多時間喺屋企等收貨。最後嘅最後，Nectar嘅產品都係有終身保養，即使床褥訓咗幾年之後有咩問題，都有專人上門幫你搞掂！

Emma

Emma床褥呢個品牌之前喺香港都做過一陣宣傳，相信唔少讀者都已經有聽聞過。作為同樣專營mattress-in-a-box嘅品牌，Emma嘅選擇就更為精簡，總共只有3款選擇，分別係：價錢最平嘅經典款、配備18cm彈簧嘅進階版，以及加入涼感物料嘅豪華版本。

同Nectar一樣，因為款式較少，床褥備貨較簡單，所以基本上都有現貨唔使等。Emma嘅免費試用期就比Nectar短，只有200日，但應該都足夠試出張床褥啱唔啱訓。至於保養方面，Emma都有成10年保養期，中間床褥有咩問題，都可以搵專人修理。比Nectar好嘅係，部份百貨公司床褥部有機會有Emma床褥試訓，但選擇就未必齊全，亦都唔係間間有，大家行開John Lewis個啲都可以入去望望。另外就係Emma要加錢先可以指定收貨日期，呢個相對Nectar就冇咁方便啦。

Simba

Simba嘅床褥有3個唔同系列，分別係最平嘅Simbatex Foam記憶棉款、Simba Organic有機版本，同埋Simba Hybrid混合版。裡面再有唔同價錢，唔同配置嘅選擇，大家可以入網站再詳細揀。

同Emma一樣，Simba都有免費200日嘅免費試用期，大家可以訓返咁上下先決定要keep定要退換，同時亦都有10年保養期，用家可以安心使用。比較方便嘅係Simba係有免費嘅Next Day Delivery，即係今日落單、聽日就到貨，如果你係非常急住用，咁Simba呢個功能就啱曬你啦。

最後提提大家，無論係門市定係網店，基本上所有床褥品牌都係長期做特價。所以就算係售貨員同你講話減埋呢個星期就冇折扣，抑或見到床褥以原價賣緊，大家都可以唔使太心急，真係揀清楚，等到下一輪優惠嚟到再買都唔遲！另外就係床褥尺寸，記得英國嘅King Size先等於香港嘅Queen Size，買嘅時候千祈唔好搞錯，如果唔係就收到貨都冇用～