超市Sainsbury’s買野用Nectar Card賺里數回贈教學

點賺Nectar Points

賺Nectar分唯一嘅要求就係成為Nectar會員，免費嘅。只要你有個會員號碼或者相應Barcode/QR Code就可以開始儲分喇！建議都係帶實體卡出街，因為self checkout掃電話入面既Barcode/QR Code好易反光掃唔到！

最簡單賺分嘅方法係去Sainsbury’s超市埋單嘅時候掃Nectar Card。每洗£1就賺1分。Sainsbury’s油站入油都有得加分，但係每£1就少過1分。

買野畀完錢嘅時候，印緊收據嘅同時，有一定機率會印埋一啲紙優惠券出嚟。呢啲優惠券係綁定落你個Nectar戶口嘅，所以喺地下執到人地嘅優惠券都冇用嘅。優惠種類都好多種，有啲係下次雙倍分、三倍分、買家品加分、去Sainsbury’s油站入油加分都有。如果有用得著嘅券，下次畀錢之前掃埋券上面個碼就可以用到優惠喇！如果有裝App既話，仲會隨機彈個刮獎遊戲，正常都抽到5-10分，好彩既話20分都有。

賺分賺得最勁嘅方法係裝Nectar App。佢會根據你喺超市買野嘅習慣去提供每周精選，會有notification畀你。入到個App只要你按Save Offer，之後跟住佢買野，就可以賺返每個物品相應嘅分喇。例如我呢張圖入面買一盒車厘子就送20分，相等於你洗£20賺嘅分喇！有啲貨品送過百分都有！除此之外，App入面間唔中都會有活動，例如一個月買夠蔬果目標又有得加分。

其實除咗Sainsbury’s買野可以賺分，Argos洗錢都可以賺Nectar Points！

Nectar Points值幾錢

Nectar分自己本身都可以當現金用，喺Sainsbury’s、Argos等商戶可以每500分就可以當£2.5洗。

至於Nectar分可以轉Avios英航里數其實係2021年頭先有嘅，只要連結Avios戶口後就可以進行轉換。兌換率係每400 Nectar分就轉做250 Avios，假設1里值1p，每400 Nectar Points = 250 Avios = £2.5，會稍為值錢過直接當現金用。轉換時機可以係手動轉，或者可以喺Nectar App設定每夠400分就自動轉250 Avios。而且轉換係兩個方向都得嘅！如果你覺得里數唔實用，都可以轉返做Nectar分使用。

回贈率：每洗£1賺1分Nectar Points，每400分換250 Avios（價值£2.5），相等於0.625%回贈率。

申請Nectar Card

點樣再賺多啲回贈？

除咗做超市會員賺分，如果畀錢用信用卡賺埋信用卡積分，雙食就最正喇！睇睇呢期邊張英國信用卡最多優惠啦！