唔知大家以前喺香港會唔會join吓運動/健身班？小編我就一路都有做下瑜珈嗰啲，但過到嚟英國之後，因爲價格比較貴加上地點未必就腳，一路都建立唔到以前嘅運動習慣。最近就畀我發現咗有個唔錯嘅app叫ClassPass，可以一個錢玩曬唔同centre唔同運動。個人覺得都算抵玩，呢度同大家分析一下ClassPass試用嘅優劣。

ClassPass試用評價

優點一：價格合理

首先梗係要講講個價錢啦～ClassPass係以Credit制形式去運行，總共有4款月費plan揀：

除返開一定係最多Credit嘅Plan D最平，不過建議大家跟據自己做運動嘅頻率同項目購買。譬如瑜伽大概5-8個Credits就可以上到一堂（視乎機構同地點），Plan A都已經後一個月每星期一堂。至於少見啲嘅班例如Pilates咁，就要大約10-15 Credits一次，咁就要起碼Plan B先做到一星期一次啦。

但ClassPass好嘅地方係其實買多買少都冇話好大問題。唔小心買少咗嘅喺月中都可以加買One Time Credits，可以選擇2、10、25、50個咁買，不過均價就貴少少，每個£1.5。亦可以一次過買75個Credits，平均£1.4一個。

買多咗嘅亦唔使擔心浪費錢，每個月所買嘅Credit數量係可以免費帶落下個月。即係如果你買Plan A，每個月可以免費帶返所買嘅27個Credits去下個月繼續用；如果買Plan B，就可以帶52個咁樣。所以萬一用唔曬，可以先暫停一個月，用埋上個月用剩嗰啲先，咁就唔怕嘥錢。

亦都可能有人問，經呢啲平台報班，一定唔夠直接落舖頭報咁平啦！老實講我一開始都係咁諗，仲打算試用完揀好邊間最好，就停畀錢然後直接跟間舖買。點知又真係畀我發現係經ClassPass平啲！

通常你每㩒入一間舖頭，ClassPass都會話你知經平台報可以慳到幾多%。我自己亦都親身計過，直接喺我做開間舖頭報一堂Pilates，用最平嘅價錢一次過報20堂咁，每堂平均都要£20。但勁ClassPass報，一堂只係10個Credits。用Plan A計即係£14.4一堂，平足28%！最正嘅係ClassPass間唔中會放出一啲賣唔曬嘅last minute quota，一般都會再減2-3Credits甚至半價，小編就試過5個Credits上一堂Pilates，如果時間適合就真係好抵玩！

優點二：地點選擇多

第二個好處就係經ClassPass統一報名，就唔需要再被限住做死一間舖。尤其當你屋企附近唔係好多選擇，想周圍試下先，又或者一時想閒日放工後喺公司附近做、一時週末喺屋企隔離做，都完全冇問題，可以按照自己嘅需要，自由選擇上課地點同埋時間。

小編exactly就係呢個case。一開始未知邊間啱自己，唯有呢度試兩堂、嗰度試兩堂咁，喺舖頭報就未必有呢個flexibility。之後又因為想訓練自己養成規律運動習慣，打算放工後喺公司隔離做，於是又試咗幾間市中心嘅centre。個人覺得咁樣好適合三心兩意嘅人（即係我），有時有啲新意冇咁悶先堅持到做運動㗎嘛！佢個app本身就有地圖搜索功能，要搵自己附近嘅班話都冇咁易！

優點三：服務範圍廣

講到靈活同埋多嘢揀，就不得不提佢嘅服務範圍！除咗重量訓練、瑜伽、拳擊等等香港都常見嘅項目之外，仲有踩單車（室內播音樂律動嗰隻）、Zumba同Barre呢啲香港少見嘅。就算你唔係玩開個樣運動，間唔中想搵啲新挑戰，都可以好方便用返同一個Plan入面嘅錢去試！小編鍾意訓練柔韌性、肌肉力量類型嘅運動，對類似芭蕾舞嘅Barre超有興趣。

除咗運動之外，ClassPass仲有好多個人護理項目、療程可以揀，包括美容、按摩，甚至整甲，不過一節所用嘅Credits就會比較多，但都不失為獎勵自己輕鬆下嘅好選擇。

缺點一：質素不一

但正因為選擇非常多，有陣時未試過真係唔會知道間舖頭教學質素好唔好。雖然ClassPass叫做有個review system，可以根據留言同埋評分判斷課程質素，但其實呢啲評分通常都係成間centre咁樣計，人地上瑜伽班嘅感受同你做Gym嘅感受可以非常唔同。仲有好多香港人好關心嘅衛生問題，雖然ClassPass會寫明間舖頭有冇額外消毒（extra sanitisation），但始終外國人嘅衛生標準未必有我地咁嚴格，如果真係好介意嘅朋友仔可以打電話去問清楚先。

小編本人就試過中伏，本身報咗一班，諗住試試屋企附近間Yoga Studio點樣。點知原來佢係Hot Yoga但又冇係課程名、詳情個度講清楚，咁都算啦，當自己冇做好功課，硬住頭皮入去間41度嘅房開始做。點知裡面勁多人，一個老師對30個學生咁，空間又唔夠，隔離auntie做動作企唔穩，跌落嚟係會撞到我嗰款。最慘係張Yoga Mat勁臭，因為本身Hot Yoga已經會流好多汗，再加上我見唔到間舖有任何消毒程序，所以返到屋企都即刻沖返個涼先！

好彩嘅係除咗以上一次中伏經驗，基本上其他堂數都係平均以上水平，老師大多數都幾用心，會走埋嚟指導你動作咁樣。所以建議大家一開始都係周圍撒網試下水先，唔好一嚟就用曬啲Credit落一間度，費時中伏都冇仇報。（話說回來，大多數課程上堂12小時前取消係可以免費退款的，12小時內取消就要補錢，大家留意！）

缺點二：地點集中於市區

另外一樣小編唔太喜歡嘅，就係雖然ClassPass有好多唔同機構嘅唔同地點揀，但大多數都集中係市中心，分佈喺住宅區嘅就比較少。可能係因為參加得ClassPass呢個平台嘅好多都係連鎖店，而連鎖嘅分店又大部份會開喺人流多嘅市中心啦。

所以建議大家喺免費試用期間多啲探索屋企附近嘅唔同centre，確認好有啱自己玩嘅先畀錢，咁就唔會買咗啲credits返嚟冇地方用啦！又或者可以選擇放工後喺公司附近做，一般office密集嘅地區e.g. Bank、Canary Wharf等都會多啲中心選擇！

缺點三：時間選擇有限

另外比起自己搵老師/Personal Trainer，喺ClassPass上面報班毫無疑問會少咁啲時間上嘅靈活度。因為一般中心未必會將所有班都放上平台畀人book，喺app更加唔會可以好似約PT咁自己同個老師傾時間，所以上堂日子、鐘數方面始終都係要睇餸食飯。

一般比較熱門嘅時間例如放工後6:30-7:00咁，啲班都會多啲人爭，如果quota唔夠多就好容易畀人搶曬。呢個時候可以選擇bookmark定佢幾時開放booking（通常上堂日子係一星期前），較曬鬧鐘咁去book就冇問題。又或者你同小編唔同，唔介意早啲起身做完返工嘅，呢邊都好多朝早6、7點嘅選擇，啱曬各位早起嘅鳥兒～

免費試用注意事項

最後講吓試用期有咩要留意：註冊並參與免費Trial後將會獲得52個credits（要留意credit數量每期未必一樣），跟住就可以即刻用呢52個Credits預約課堂。試用月份通常啲班都會有平，試過只要畀平時所需credits數量嘅一半就上到堂！

但要留意，試用期間似乎淨係可以book運動項目，小編試過想book美容/按摩係book唔到的。另外免費credits亦唔可以book同一間中心多過一次，用淨嘅credits亦唔可以帶落下一個月，真係只係旨在畀你試下唔同班咁。

最後最後，如果想要額外嘅20個credits，姐係試用期總共有52+20=72個，就記得跟UKjetso小編獨家連結申請，登記過程冇分別，都係咁簡單！

希望以上分享對大家有用，2024年大家一齊做多啲運動，一齊健康啲變靚啲！